Pro 9 | NdeIBE | STEP | Ukuhlakanipha sekuzakhele indlu yakho, imisiwe ngezinsika eziyisikhombisa.

Proverbs 9

1 Ukuhlakanipha sekuzakhele indlu yakho, imisiwe ngezinsika eziyisikhombisa.

2 Isiphekiwe inyama yakho kwalungiswa lewayini; konke sekudekiwe etafuleni.

3 Usewathumile amantombazana, uyanxusa emi ezindaweni eziphakemeyo zedolobho.

4 “Akuthi bonke abayizithutha beze lapha!” esitsho kulabo abangaqedisisiyo.

5 “Wozani lidle ukudla kwami linathe iwayini esengililungisile.

6 Lahlani izindlela zenu zobuthutha lizaphila; hambani ngendlela yokuzwisisa.

7 “Lowo oweluleka oklolodayo ubiza inhlamba; okhuza umuntu oxhwalileyo ucina ethethiswa.

8 Ungakhuzi isiqholo ngoba sizakuzonda; khuza ohlakaniphileyo uzakuthanda.

9 Yeluleka umuntu ohlakaniphileyo uzakwandisa ukuhlakanipha kwakhe; fundisa umuntu olungileyo, uzakwengeza ulwazi lwakhe.

10 “Ukumesaba uJehova kuyikuqala kwenhlakanipho, njalo ulwazi ngaLowo oNgcwele luyikuqedisisa.

11 Ngoba ngami zizakuba zinengi izinsuku zakho, kwandiswe iminyaka yokuphila kwakho.

12 Nxa uhlakaniphile, ukuhlakanipha kwakho kuzakusiza; aluba uyisiqholo, uzahlupheka wedwa.

13 Umfazi othiwa nguBuwula ulomsindo; kagobeki njalo kazi lutho.

14 Uthanda ukuhlala emnyango wendlu yakhe, esihlalweni endaweni ephezulu embonisweni yedolobho,

15 abe ehuga labo abedlulayo, abahamba beqondile lapho abaya khona.

16 “Abeze lapha bonke abayizithutha!” esitsho kulabo abangacabangiyo.

17 “Ulutho lokuntshontshwa lumnandi; ukudla okudlelwa ensitha kuyahlabusa!”

18 Kodwa kabazi ukuthi kuyafiwa, kuleyondawo, ukuthi izethekeli zalowomfazi sezaphelela ekujuleni kwengcwaba.